【土耳其遊記 2019】土耳其九日遊（十）DAY 5 土耳其棉花堡 – 感覺中伏

（其實上年去左轉歐洲，但我竟然仲打緊呢個5年前既遊記）棉花堡呢個地方可能係我去過覺得最照騙既地方，而呢個照騙景點係要山長水遠舟車勞頓咁去的，可能十幾年前佢仲有水流果時係好靚，而家⋯⋯除非你大把時間，否則skip左不會可惜。如果你特登走過黎，咁我諗你都會有中伏既感覺。

棉花堡 Pamukkale 係土耳其西南部，同土耳其其他著名地方伊斯坦堡或者熱氣球鎮Cappadocia既陸路距離係10-14小時巴士，如果唔搭巴士，Rome2Rio話都可以從Istanbul搭飛機去Denizli再轉的士之類，咁可能三個鐘內去到，不過特登飛過去，再飛返Istanbul都係大工4程同花唔少錢，都未計本來去Cappadocia已經都係要飛機來回Istanbul，成件事都幾攰。咁山長水遠先到既地方，咁一定要好靚，靚到不枉此行先得啦，先睇下網上見到既棉花堡圖片先，真係吸引

上篇講到我前一日先去左西南海邊小鎮費拉玩，由費拉去棉花堡呢頭既 Denizli 就三個幾鐘巴士，其實都算係今個Trip比較短程既巴士路線了，都好彩我地本來都係會去費拉呢頭，唔完全係專程黎，否則睇完現實狀況，真係會覺得伏到嘔血。

話說Denizli呢頭除左棉花堡仲有另一個景點希拉波利斯 Hierapolis，係D古希臘文明既古蹟黎，同棉花堡可以話痴埋一齊，於是呢日就去曬呢個古蹟＋棉花堡，黎個世界遺產之旅咁。

由於都5年前，到左之後既細節我都唔太記得，相信呢日我地係先到落車就見到既遊客中心之類keep行李（因為晚上又要搭8 粒鐘通宵巴轉地方）。落車已經見到個棉花堡，左邊有大滑梯但我無印象果時有D咁既野

遊客中心都好似就係係棉花堡門口附近，而遊客中心前會有好多的士佬/shuttle司機，會同你講可以幾多錢車你去Hierapolis，建議你直接一野坐車上去左Hierapolis先，行完就會到棉花堡後門，之後反方向咁由山上面玩落山，就唔洗向上行山啦，然後又唔知點解我地信佢唔係黑的（可能因為果時睇其他遊記都係咁上下方前往）就上左車，價錢我都唔記得了，總之都係佢講果個價錢。諗返其實都啱，反方向咁玩仲好似去到邊都少人D，山腳最旺時你係山頂，個個上曬山頂你就係山腳咁，都少人好多，更重要係白色既範圍係規定赤腳行，呢度D地又硬又有D吉都唔好行，落山應該會舒服過上山。

Hierapolis 希拉波利斯

第一站先黎到古城，呢個地方唔係旅程重點，所以都無期望，去到就見到大片空地同無咩資訊既遺蹟（可能租audio guide會好好多，唔清楚有冇），總之整體上就係係烈日當空下行左幾個距離唔短既位睇下古蹟咁。好似之前咁，我去到寫遊記睇資料先知多D

Hierpolis 希臘文係聖城，呢個古城位於棉堡既山頂，古時呢度有温泉浴場、教堂、墓地、劇場咁

唔係講笑，真的好空曠，而且好多野都得返幾舊石。不過都有D野係完整DD：

呢個係最完整既建築。
睇完呢D都冇咩心機再仔細參觀，直落去棉花堡。

棉花堡 Pamukkale

其實去到呢度都仲係滿心期待，再Recap下我之前認知中既棉花堡係點先：

不過一入去，首先見到，心諗咩黎，咁烏糟

其實我都睇到R曬頭，因為本來以前一直見開既相係一層層好多流水咁，點解好似得一片爛地加幾個水氹咁

D水我想像中係淡藍色，個池我想像係白色，呢D咩黎

可能係角度問題啦，我地就行去崖邊D既位啦，係有分別既，不過注意我影果時係crop左黑曬果堆石，影到最遠果邊，先有白色。但起碼終於見到D水係有淡藍色既出現，如果得呢Part又真係靚。我現實肉眼睇，呢個見得人既位都係佔好小部份，距離行人路都好遠。

加上背景係好深色既農地，都唔係果種白色世界既feel。下圖呢個另一角度同zoom左終於似返樣D，不過我有執過，現實上D白色石係好灰，或者啡啡地

上面係執過既相機相，下面係iPhone直出：

我影相會傾開避開最醜既部份，又有執相，實物真係無D相咁白

iPhone相：

以下呢群我覺得係全場比較白既位，如果佢有水應該會好靚，不過去到就係完全乾塘，我仲以為係季節問題，上網睇返，原來話因為之前棉花堡景區內既酒店排出廢水同遊客D鞋印令白色岩石變色，為左天然地令佢變返白，就決定比佢曬多D太陽，曬返白（要曬幾多年？！），所以而家既棉花堡本來儲水既位都唔再有水，以免佢少左機會曬白。所以話以前黎可能好靚既，而家⋯⋯

IPHONE相：

下圖呢個位睇其實如果佢有水，真係應該會靚，但無水真係唔知係度睇緊咩
BTW果行人就係由山腳開始玩上黎既人，真係全程向上行的。

呢part 保養得比較好，不過都補下iphone圖，灰D但如果有藍色水係上面應該都會靚好多既：

棉花堡圍住一個湖，我無去到果頭睇

由於一路上山既路有好多個人造浴池，所以好多人著泳衣黎

iPhone，呢Part真係算白了。
不過無水睇一片白色黎講，比較推薦去睇雪景，起碼真係白色先，除非你怕凍。

行下行下就進入左頭先講好多人造浴池既地帶，呢度個地都係唔知咩事

話說呢度要赤腳行，但其實佢個地面都唔平，行落係要就住力睇路行，唔係腳板可能都會痛，真係好吉：

沿途就係有唔同大小既呢D池，好多人玩水，黎到都建議著D易落水既裝束，浸下腳試下都好

難得影到無咩人既相, iphone，都似既

現實：

D路真係一D都唔好行，上山應該真係幾CHUR

當我行到山腳時，大部份人都上曬山，所以開始易影到無人既相，下面好似好白，現實都係啡啡地，但都算係咁

呢張睇返覺得都幾靚，不過我記得當日覺得呢個地方同靚字係無關係的

我一執相就會忍唔住執到無咁醜，所以以上既相都盡力比返D手機相大家參考下，會準D
睇完仲想唔去唔就自行決定了如果有FRD話想去我都會叫佢三思，用兩三日黎呢度，真係用黎去其他地方好過純粹想打個咭影下照騙，白雪雪背景，咁都有既，但淡藍色泉水就難D影到。

落到山腳就完了呢個旅程，係時係食下野，出口我記得有間雪糕店你一見到就會想食，因為曬左咁耐好熱，我個FRD諗住都係果D價就直接要一支啦，當然又係有果D土耳其雪榚式撚客環節，呢個無問題，但最伏係最後佢講個價錢係貴到我地呆左，總之擺明係伏你同劏客，銀碼唔記得了，如果見到真係要小心。

入左一間落到去有好多土耳其地氈係入面既餐廳，叫Ottaman House Restaurant（圖右），幾有民族色彩，但睇返Google Map話執左了，記得都幾好味的，老闆娘好似仲好鐘意我個frd

只記得食左呢個酸酸甜甜地辣辣地既食物，好岩胃口

食完呢餐我地就返去拎行李準備上車出發去我好中意既蕃紅花城 Sanfranbolu 了。

如果想睇更多歐洲遊記或問問行程資訊，
歡迎Like Facebook Page 芒果豆腐花遊記～

【土耳其遊記 2019】土耳其九日遊行程一覽：https://bit.ly/3vUbHRX
【歐遊 2018】獨遊瑞法德奧17日童話小鎮仙境遊路線行程： https://wp.me/p8A312-14I
歡迎 Follow Facebook page 留意最新資訊同遊記：芒果豆腐花遊記