【Backpack攻略】行李篇——必備、不必帶既裝備

Plan曬所有路線、住宿後，臨出發之前不少得要做既當然係執行李啦！問題黎啦，背囊定拉篋好？要帶幾大個背囊？有咩要帶？有咩可以唔帶？玩個半月行李都唔夠5KG既我希望呢篇幫到大家。

首先，我做backpacker既時候去旅行一次比一次帶更少野，因為一路去一路覺得去得舒服重要過所有野（包括靚），同埋會發現好多野帶黎都多餘。去到最後幾個trip，我只係用一個Doughnut既返學背囊、5KG 都無，就裝曬所有野出發去個幾月旅行喇！所以成日好疑惑點解D人去揹半個人咁大既背囊。

順帶一提，其實最好都唔好用返學果d背囊去旅行，因為雖然可能好睇，但佢地多數無護脊，建議用其他有護脊背囊，例如我之後就買左Doughnut既Woodland系列，佢地唔太細又唔太大，最重要係好多為背包旅行度身訂造既設計！（全自費 唔係廣告）

呢個係我17日旅行既行裝。（另外仲有個迷李既出街用迪卡儂背囊仔: 22*30 cm大）

拉篋 VS 背囊？

歐遊黎講，我會用背囊。原因好多，例如：

• 內陸機handcarry慳唔少行李費，有D巴士直頭你用到巴士行李倉都要收你幾歐
• 歐洲古城磚地凹凸不平，拉篋加倍吃力。
• 落雨拉篋麻煩都算，落雪既真係等於要用手搬篋、抱篋，想像下都覺得好攰。
• 歐洲唔少住宿特別係apartment、airbnb都無𨋢搭，孭背囊行上行落點都好過搬。
• 搭車搭火車可以安心攬住行李，帶篋你要看實佢。
• 歐洲細既火車站、好多地鐵站都無電梯或者𨋢，有都未必方便，通常要兜曬路先到𨋢口，所以上落都唔方便。
• 個人去歐洲唔似去日本，除左磁石都無咩要買，一對鞋走天下，唔洗用到篋。
• 唔好彩去到某個地方想day trip但搵唔到locker/寄存服務，都可以直接孭住去玩，唔洗花時間拉住個篋搵地方寄存。

不過始終人人旅行風格同重視既野唔同，拉篋係無咁方便，但都唔係人人都啱用Backpack旅行既。

咩人唔適合用背囊歐遊？

• 腰背長期有傷患、一揹重野就痛既人，長期負重呢D活動真係唔建議你做，就算揹都一定要揀個護脊既，感覺會差好遠。
• 去歐洲打算影好多靚相，所要換N套衫、幾對鞋既人。
• 打算去到瘋狂購物、掃貨既人

帶幾大個背囊？

呢part比較廢話，因人而異，但主要考慮以下呢幾點：

• 季節 + 你會唔會洗衫：
  冬天去一般要大D，因為衫可能厚D佔多D位，又頸巾、手套果D，當然冬天唔出汗所以一件頂耐d唔洗都得，可以帶少幾件，咁可以唔洗特登要大好多既袋；
  夏天衫薄，但換既頻率高D，勤力洗既帶少D衫，背囊就唔洗咁大，懶得洗要帶多D既就預大D。
• 多唔多大件器材：
  有相機呀、幾支鏡既就帶大D，當然都可以長期掛頸/斜孭既。
• 會唔會玩露營：
  無行開山、Camping既習慣，但見呢D人多數好多裝備，就要大d。

有咩必帶？

• 兩季必帶

1. 護照 證件：身份證、學生證
2. 錢 / 銀行咭 / Activate左海外交易、你記低左信用咭交易pin既信用咭
3. 車票（如要print）
4. 底衫褲：
   下身呢D咁少布既野其實佔位有限，帶3-5條都得
   bra比較佔位，帶一個替換，變態講句：可以一個著幾日。
   底衫冬天我只會帶一件替換，夏天吊帶底衫就兩件。
5. 薄睡衣一套（我唔帶替換，唔會日日洗，如有需要出門口前洗，晚上返黎就乾、著得）
6. 一套出街衫替換（前提要唔介意張張相一樣衫）
   一條薄連身裙最方便、或者著半截中長裙/褲，剩係換上身衫
   鬆身d既衫褲可以唔洗洗得咁密
7. 襪
   冬天我著Merino羊毛襪，佢既技術聲稱可以比你5日唔洗，著一對、帶一對。
   夏天我成日著涼鞋出去，有需要就帶兩對薄襪，洗都快乾。
8. 相機 + SD card+電、手機
9. 以上既充電器、尿袋、各種USB線
10. 上到網既 SIM card
11. 萬能轉插，越多USB hub 越好
12. 耳機
    最主要用黎聽歌mute左飛機或者巴士喊B既聲。
13. 拖鞋
    防水、輕（夏天12蚊店好多超輕）、出到街既更好，可以住宿時沖涼出入著，我會著住沖，因為覺得外面浴缸都污糟，游水都可以著。
14. 出街用既袋仔
    唔洗下下出街都倒曬背囊D野出黎，我會有極細個斜揹袋或背囊仔，冬天直頭唔帶，要既野放係褸既袋就算（利申 袋口要有拉鍊/鈕）
15. 藥品：頭暈、止痛、清腸丸、舒筋貼、個人藥品
16. 止汗用品 / 香水
17. 沖涼毛巾
    細同薄，可以快乾、唔阻位
18. 洗面野、保濕產品。
    hand carry既話要分裝到100ml一支，你帶幾多支都得，但每支唔可以多過100ml（e.g 你可以帶10L既hand cream，但你要將佢分裝入100支100ml既樽仔度）
19. 濕、乾紙巾一兩包（可以買，但廢時啦又輕又唔佔位）
20. 女士：M巾（一、兩塊備用得啦，要既到時先買都得）
21. 指甲鉗
22. 梳、洗面時夾起D頭髮既夾/魔術貼、橡筋
23. 棉花棒
24. 眼鏡 / con /+ 100ml以下洗 con水+夾+盒
25. 眉筆、唇膏（就算唔化全妝都要夠精神）部分人可能會帶埋其他化妝品
26. 備用膠袋 （髒衣、方便分類行李）
27. 輕餐具（備用，因為有時買乳酪、沙律、雪糕等佢都唔包餐具，當然有D貨架都會有埋比你自費買）

• 夏天必帶

1. 太陽眼鏡
   非一般既殘眼，不過當地好多店都賣得幾平
2. 蚊怕水
3. 防曬
   男女都要，四圍都無瓦遮頭唔似香港，到時膊頭曬到甩曬皮再孭背囊生不如死
4. 止痕膏
   當蚊怕水無用時…
5. 帽
   頭頂易曬傷，微雨又用得
6. 一對硬皮書封面咁薄既出街涼鞋或拖鞋
   輕便、出街唔洗著襪，洗少樣野。
7. 泳衣（除非你去非海邊城市）

• 冬天必帶

1. 頸巾、手套
   但我會keep住戴係頸、手
2. 厚褸
   當然著住啦，比多一兩千投資件著一件就夠暖、防雪、防水、防風、著到一世既雪褸，你唔會後悔。仲可以因為夠暖，帶少好多件衫。
   （就算落雪，我extra heat tech+面衫+雪褸就夠暖，無雪褸既應該要著5層衫加件普通褸都未夠暖）
3. 暖包幾個 （對我黎講）
4. 保濕產品
   多數凍既地方都特別乾，cream真係唔少得，唔係會成日都好痕

邊D係旅行成日會帶但對Backpacker黎講可能唔等駛既野？

1. 沖涼液、洗頭水
   如果唔介意用酒店果d ，但有d國家酒店唔提供（唔多既）
   如果十幾日內都唔會搭飛機，我會直接去超市買支 2in1 Head & Shoulder，係果十幾日用曬佢。
2. 訓覺保暖衣物
   歐洲既暖氣四圍都有，好正，係室內你只著一層睡衣都唔會凍。反而你著超厚底衫可以會熱醒。
3. N支鏡頭
   除非你超執著呢方面/有特別野想影，我習慣一支廣角鏡+定焦餅鏡就得。
4. N條褲
   一條長裙或者褲著住走天下
5. N套衫
   洗衫吧！ 同埋如果係 apartment hotel有D會有洗衣機，好方便。
6. 幾個手袋
   見過有人會帶幾個手袋，其實好徙位，皮袋仲好重。
7. N支護膚野
   係香港都極少用呢D野既我成日FF去旅行會敷住mask 睇電視、寫遊記。太天真了，試過兩次帶完無用過後，就唔再帶。當然，保濕cream 同防曬幾時都要帶定d。不過我見韓妹住hostel真係個個臨訓full mask，都因人而異既。
8. 風筒
   太徙位了，多數酒店都有，如果無就自然風乾，果度天氣乾燥，唔洗好耐都乾。不過如果你對髮型要求比較高，或者用慣風力大既風筒，咁都係自備好D，因為間間酒店D風筒風力都好弱，只叫做有，但多數並唔好用。
9. 電腦
   除非工幹或者有大量media要 back up
10. 飛機頸枕
    以前用過覺得都係效果一般，唔知係咪因為果個設計唔好，慢慢我就慣左唔洗用都沉睡到。如果要慳位就帶吹氣果種，無咁徙位。不過一但過左25歲，唔知係咪d肌肉骨頭開始廢，完全無承托咁訓覺都真係有點辛苦。
11. 遊記
    又係想像得太美好既野黎。帶親都無寫，太攰同無時間寫，搭車、搭飛機時打係手機算。

最後就係：

其實唔洗怕帶少左野，果度D人都要生活，所以你要既野，
果度都會有得以正常價買到既！對自己肩背好D喇！

---

歡迎 Like 我既Facebook Page 緊貼最新既遊記及攻略 : 芒果豆腐花遊記 

更多遊記及資料整合：芒果豆腐花遊記網站 https://mangotofufa.wordpress.com/