黎到旅程第3日，就係全trip最難忘既環節——Cave House 天台睇漫天熱氣球日出景
。今日天氣好到不得了，好清，眼前所見既真係出乎意料地極度靚，靚到好似假、key上去既一樣。黎到Cappadocia，真係一定一定要有一個早上係係酒店天台睇風景，靚到癲，癲到影相點加filter點tune都表達唔到佢現實上既癲！！
係住宿報告前，一於直接飛去講第二日呢個風景環節先。
話說黎到Cappadocia如果你要有所收穫，真係唔會可以好chill好舒服咁玩，因為最起碼你每朝都要5點前起身。今日已經係我地第二日係夏天日照極長既歐洲度，天都未光4、5點就爬起身出發，不過好彩天台睇風景只係需要出房門、行上去就到，但要影靚相當然都要預早時間換靚換化下妝。至於出發時間，就要睇定天氣app既日出時間，再提早d咁，越早越好，因為你酒店入面其他人都係為左睇呢個景而黎住，你早d就會係最佳時間霸到最靚既打咭位靚相。
Cappadocia其中一個好正既位係，佢好多天台好靚既Cave house酒店都唔係貴，人均唔過500蚊，所以好多人都可以afford到（唔似Santorini Oia咁一房四、五千起跳），個個都可以留係自己酒店天台睇風景。由於酒店人數多極有限，仲有d人係會出去玩熱氣球/上山睇，所以天台都唔會太多人，可以好鬆動咁影相，咁就唔會搞到個個要特登走到去某個觀景台，成村人一字排開咁你擠我擁咁睇。如果真係咁睇日出法，影相效果都唔會好，同時個體驗亦唔會有feel。呢度大概係我地當日天台既人數，人唔多，記得都係得4、5組人，全部都應該係酒店客。
所以想黎玩，第一件事就係上酒店網，搵間天台景觀開揚、有幾個打咭位既酒店就啱啦，位置方便反而可能係其次，因為呢度大部份行程都有酒店pickup service，住邊都係門口上車、落車。
我地呢日出到門口，個天已經有dd光，正正係就黎日出既時間，已經有唔少熱氣球開始飛左上天，已經係超級靚。 但sorry我影出黎勁暗，現實真係完全唔同層次。
一路行上去天台（樓梯係屋外），我地兩個都係不斷哇哇聲，因為真係靚得太震撼。唔洗幾耐，個太陽過左座山開始，d光靚到傻。由於我地唔係最早上去既人，當時打咭位全部有人影緊相，我地求其去左個邊位影下相先。
大陽升起之後，你亦會見到天上既熱氣球越黎越多。
雖然打咭位被人用曬，不過好彩大家都算自律（雖然都等左有d耐，因為想像3個女仔專程黎打咭，每人係一個位唔同pose咁影獨照好多張，再3個人唔同組合咁合照好多張，一定會搞好耐，所以早d上黎會好d
），影完就會讓比其他人影。以下係我覺得最打咭able既位: (呢幾張係手機相，畫質會差D）
台面既野都應該係酒店一早放出黎做道具用既，因為果3個女仔走左之後都係放係度，我地就可以用，咁就可以係度影d扮一齊飲野既相
呢個位真係不得了，其實因為呢trip我想幫自己影多d相留念多過影景，所以睇返原來得景既相其實無咩
到我記得要影景既時候，已經少左好多氣球。
除左呢個位，仲有幾個位都可以打下咭，呢個位都影左好多相
仲有呢張床都好靚，不過當然唔會係度訓，都係坐上去影下相
。唔知係咪早上有d濕氣，印象中坐上去都好似有d唔係乾爽既感覺。
坐係呢個位影會勁靚，呢度真係影相一流（當然要避開樓下d車）
真係好靚好靚好靚好靚好靚好靚。
想像係大概你見到平時行過豐澤d電視機見到播住土耳其熱氣球果d畫面，但成個screen放大20000倍咁放係你面前，置身其中，感覺真係好奇妙。
到我記得影風景時，已經少左好多氣球，天都就黎光曬
頭頂飛過
以上已經係我手頭上既風景相，因為大部分時間都係同frd互影，所以比較少風景相既貨。
以影天台打咭相黎講，我覺得呢間人均唔洗$500港紙既Cave house黎講，已經好夠做
超抵玩。
Divan Cave House 住宿報告
居住時期：2019年6月中
價錢：二人Twin Bed Room 人均 $442，包土耳其早餐
房間風格都係石屋黎，呢間房比上一間人均$233既大，一個範圍放曬兩張床
有趣地佢仲有個偏廳之類係個角落頭
浴室方面，佢都比上一間大，不過上一間個裝修好似貴D同埋光猛D。呢間就好有石屋風味
而佢個浴室都幾搞笑
Overall 間房都係偏暗，但係就乾淨企理，住得舒服。
酒店早餐
同上一間一樣，都係果d一大盤好似琴日淨左再用既土耳其style早餐
我都似拎左d似無咁伏，同唔似會肚痛既野填飽個肚就算。
食完早餐，抖多陣就展開第2日既Green Route Day Tour 綠線之旅啦。
如果想睇更多歐洲遊記或問問行程資訊，
歡迎Like Facebook Page 芒果豆腐花遊記 ～
【土耳其遊記 2019】土耳其九日遊（一）行程一覽：https://bit.ly/3P7hh7o
【歐遊 2018】獨遊瑞法德奧17日童話小鎮仙境遊 路線行程 ： https://wp.me/p8A312-14I
歡迎 Follow Facebook page 留意最新資訊同遊記： 芒果豆腐花遊記
MANGO TOFUFA 